galego | español
texto grande
buscar

Noticias

venres, 14 de decembro de 2018
"O Concello do Grove ofrece unha variada programación para que pequenos e maiores gocen do Nadal"
foto
Cartel das actividades de Nadal

 

O Concello do Grove organizou para as vacacións de Nadal unha ampla e atractiva programación de actividades e actuacións para todas as idades, coa finalidade de que grandes e xente miúda gocen destas festas. Todas as concellerías xuntan esforzos e recursos para ofreceren un ambicioso calendario que mestura espectáculos de monicreques, maxia, proxeccións,  obradoiros, exposicións, fomento do galego e outras sorpresas para aproveitar ao máximo estas vacacións en familia.

 

Para promover a lectura e o uso do idioma entre infancia púxose en marcha a iniciativa “Carta aos Reis Magos”, para o cal se repartiu entre os centros educativos da vila un modelo de carta en galego deseñada e ilustrada polo grovense Anxo Rodríguez co fin de que a cativada se anime a pedir os seus agasallos na nosa lingua. As cartas pódenselles entregar aos carteiros reais ou depositalas na Caixa do Correo Real instalada na biblioteca municipal do Grove.

 

O venres 21 comezan as actividades cunha tarde en familia na Casa da Cultura Manuel Lueiro Rey. A partir das 18.00 horas entregaranse os premios do XX Concurso de Postais de Nadal e, a seguir, o público asistente gozará do espectáculo de monicreques A galiña azul, a cargo de Tanxarina Títeres. Unha fantástica función que acadou o premio FETEN ao mellor espectáculo de títeres 2018.

 

O 22 de decembro ás 12.00 h, na sala das Cunchas da Casa do Concello, terá lugar a inauguración da exposición e o acto de entrega do VI Premio do Concurso de Pintura Ernesto Goday. A exposición poderá ser visitada ata o 15 de xaneiro de 2019.

 

O mesmo sábado 22, a partir das 19.00 h, terá lugar no salón de actos da Casa da Cultura Manuel Lueiro Rey a proxección da serie A partida, do grovense Lois Basallo, que conta coa participación de Claudia Basallo e Anxo Meis. A entrada é libre ata completar a capacidade.

 

Do 24 de decembro ao 7 de xaneiro desenvolveranse na Casa da Cultura Manuel Lueiro Rey os "Obradoiros de Nadal", un programa de actividades lúdicas cuxa finalidade é ofrecer unha alternativa lúdica para a conciliación familiar durante estas vacacións escolares.

 

O venres 28 a partir das 18:00 h na Casa da Cultura Manuel Lueiro Rey as familias poderán desfrutar dun novo espectáculo de maxia: Ledicias, a cargo do Mago Paco, que fará un percorrido polos seus mellores xogos de maxia para mergullar o público nun mundo fantástico, cheo de ilusión e bo humor. Nesta xornada entregaranse os premio ás mellores lectoras e lectores do ano.

 

Xa o sábado 29, ás 12.30 h, a Apalpadora visitará a rúa Castelao para repartir landras e ilusión, dentro da programación “Nadal en Galego” organizada pola Deputación de Pontevedra.

 

O domingo 30 vólvese a organizar a Carreira San Silvestre Escolar do Grove. A saída será a partir das 10.30 h na praza do Corgo.

 

A primeira actividade lúdica de 2019 desenvolverase o venres 4 de xaneiro ás 11.30 h e irá destinada á xente máis nova da casa, a rapazada de 1 a 7 anos. Baobab Teatro achegará ata a Casa da Cultura Manuel Lueiro Rey o seu espectáculo Puño Puñete, con música en directo, cantigas, contos e tradición oral que chega á nosa vila a través da Rede de Dinamización Lingüística da Xunta de Galicia.

 

Cabalgatas e visita do Carteiro Real

 

Ademais de todo o anterior, tamén hai que sumar as cabalgatas de Papá do Nadal e dos Reis Magos, o 24 de decembro e o 5 de xaneiro, respectivamente, así como as visitas do Carteiro Real ás casas de cultura do Grove, o día 2 de xaneiro, e de San Vicente, o día 3 dese mesmo mes. A cabalgata de Papá do Nadal saíra ás 19.00 h desde a ponte da Illa da Toxa e percorrerá as rúas Castelao, da Praza, Beiramar, Luís Casais e Castelao. No caso da cabalgata dos Reis Magos, sairá ás 18.00 h desde o colexio Valle-Inclán e rematará na praza do Corgo, onde serán recibidas as Súas Maxestades de Oriente, quen lles dedicarán o seu habitual saúdo á vila do Grove. O acto rematará cunha chocolatada.

 

 
Galería:
 

axenda

calendario
mes anterior marzo | 19 mes próximo
LMMXVSD
123
45678910
11121314151617
18192021222324
25262728293031

noticias

Rede de
bibliotecas

perfil do
contratante

portal de
turismo

boletín ADL

Apúntate ao noso boletín

boletín OMIX

Apúntate ao noso boletín

avisos sms

síguenos en
logotipo consellería innovación e industria logotipo Ministerio Industria, turismo y comercio logotipo FEDER

2009. Concello do Grove, Praza do Corgo nº 1 | T. 986 73 09 75 | F. 986 73 13 58
aviso legal | créditos | rss
páxina accesible AA rss