Medio Ambiente

A península do Grove conta con amplos espazos naturais que se integran en diferentes figuras de protección.  

Complexo Intermareal Umia–O Grove

A desembocadura do río Umia crea unha baía moi protexida, de pouca profundidade e con amplas superficies intermareais. Estas características permiten que esta zona conte cunha valiosa e variada riqueza ornitolóxica durante todo o ano, aínda que son maioría as especies invernantes. Destaca a abundancia de especies limícolas e anátidas, tanto de paso como invernantes. As figuras de protección presentes neste espazo son:

• Zona de Especial Protección dos Valores Naturais
• Zona Húmida Protexida (Complexo Intermareal Umia–O Grove, A Lanzada: 2.476,72 ha)
• Lugar de Importancia Comunitaria (Complexo Ons–O Grove, LIC ES 1140004; 7.506,75ha)
• Zona Ramsar (Complexo Intermareal Umia–O Grove, 7ES011; 2.561 ha)

Complexo Ons–O Grove

Este espazo inclúe o Complexo Intermareal Umia–O Grove–A Lanzada–Punta Carreirón e Lagoa da Bodeira, xunto coa zona de costa aberta que se sitúa entre Reboredo e San Vicente do Mar. Neste tramo altérnanse pequenos areais e costa rochosa de media e baixa altura, no cal destaca o sistema dunar da praia da Mexiloeira e a Lagoa da Bodeira.

As figuras de protección presentes neste espazo son:

• Zona de Especial Protección dos Valores Naturais
• Zona Húmida Protexida (Complexo Intermareal Umia–O Grove–A Lanzada: 2.476,72 ha)
• Zona de Especial Protección para as Aves (ZEPA ES0000087 Complexo Intermareal Umia–O Grove, A Lanzada, Punta Carreirón e Lagoa da Bodeira)
• Zona Ramsar (Complexo Intermareal Umia–O Grove, 7ES011; 2.561 ha)

A Lagoa da Bodeira

Este lagoa litoral forma parte dos espazos anteriormente citados, mais as súas características merecen unha mención á parte. A Lagoa da Bodeira é a única lagoa litoral de auga doce da provincia de Pontevedra. Esta singularidade é un gran atractivo para a fauna ornitolóxica que habita nas zonas próximas.

As figuras de protección presentes neste espazo son:

• Zona de Especial Protección dos Valores Naturais
• Zona de Especial Protección para as Aves (ZEPA ES0000087 Complexo Intermareal Umia–O Grove, A Lanzada, Punta Carreirón e Lagoa da Bodeira)