O Concello do Grove, a través do seu persoal e con material propio, instalou un valado nun inmoble abandonado situado na rúa Conchases. Este edificio era un punto que xeraba inseguridade, incomodidade e certo risco, tanto para o tránsito peonil e a veciñanza da zona como para a mocidade que adoitaba acceder ao seu interior, xa que carecía de protección ningunha que dificultase a entrada ao predio.
Coa instalación deste elemento de protección, ademais de impedir que se poida acceder libremente ao interior do inmoble, tamén se evita o perigo que supuñan os ferros existentes na propia fachada, que poderían desprenderse e causarlles algún dano aos transeúntes nun lugar moi transitado por menores, xa que está nun camiño escolar seguro.
Esta actuación complementarase pintando a rúa con zonas de paso de peóns e pictogramas que ofrezan maior seguridade peonil, xa que é un acceso moi concorrido para acudir ao colexio Rosalía de Castro.
