Desde o mes de abril pasaron máis de 200 persoas solicitando información e ás que se lles tramitaron as súas reclamacións a través da OMIC

O Concelleiro de Economía, Facenda e Persoal, Juan Luis Callón Cameán, informa de que o Concello do Grove continúa apoiando e intentando axudar as persoas afectadas pola subscrición das participacións preferentes e das obrigas subordinadas, dentro do seu marco competencial.

Este apoio teno vehiculizado a través da Oficina Municipal de Información ao Consumidor (OMIC) do Concello do Grove que continúa asesorando, informando e tramitando todas as reclamacións dos afectados facilitándolles o acceso ao procedemento de Arbitraxe, Mediciación ou Reclamación ante a Administración.

Desde o Grupo de Goberno Local espérase unha solución inmediata para as miles de persoas afectadas que lles permita recuperar o 100% do nominal dos títulos subscritos e poder recuperar a totalidade dos seus aforros.

Así mesmo, faise necesario destacar que o Pleno da corporación municipal do Concello do Grove acordou por unanimidade na sesión do 26/04/2012 a seguinte moción:

“1º.- Apoiar ás persoas afectadas polas participacións preferentes nas súas legais reclamacións e prestar información ás mesmas, a través da Oficina Municipal de Información ao Consumidor.

2º.- Instar a Xunta de Galicia a que:

a) Inste o Banco de España e a CNMV para que promovan, e no seu caso presten ás autorizacións necesarias a Novagalicia Banco e ao resto das entidades financeiras, para dar solución á recuperación do investimento realizado polos subscritores de participacións preferentes en Galicia que desexen recuperar os cartos investidos neste produto.

b) Inste as entidades financeiras que operen en Galicia e que emitiron participacións preferentes para que promovan unha solución aos subscritores de participacións preferentes que desexen recuperar os cartos investidos neste produto, permitindo aos afectados a recuperación íntegra do investimento realizado.

c) Apoie e informe os posibles afectados pola comercialización das participacións preferentes sobre as vías de reclamación das que dispoñan a través das oficinas do Instituto Galego de Consumo.

d) Demande das autoridades competentes o cumprimento estrito da normativa MIFID (Directiva sobre Mercados de Instrumentos Financeiros) na comercialización no tramo minorista de produtos financeiros.”

Igualmente faise necesario destacar que o Pleno da corporación municipal do Concello do Grove acordou por unanimidade na sesión do 26/07/2012 a seguinte moción:

“1º Instar á Xunta de Galicia a promover, no seu ámbito de competencias, e a demandar do Goberno do Estado Español e da Comisión Europea da Competencia, unha solución inmediata para as miles de persoas afectadas pola fraude das Participacións Preferentes, que teña en conta a existencia de malas prácticas e comercialización indebida polas entidades financeiras, que lles permita recuperar o 100 % do nominal dos títulos subscritos.

2º.- Demandar de Novagalicia Banco que garanta os postos de traballo, así como asegure unha adecuada atención aos clientes da entidade.

3º.- Comunicar o presente acordo ao Presidente da Xunta de Galicia, Presidente do Goberno do Estado e grupos parlamentarios do Parlamento de Galicia.”

O alcalde do Concello do Grove mostrouse satisfeito polo servizo prestado desde a OMIC a estes afectados e manifestou que “animo a todos os afectados a que non dubiden en utilizar a nosa OMIC municipal ao obxecto de que poidan recuperar os seus aforros canto antes".