Nomeados os “Centola de Ouro” de 2015

Fecha: 2015-09-23

Javier Olleros, Miguel Muñíz, Transportes Cameselle e as empresas conserveiras do Grove recibirán o Galardón na Gala do vindeiro 9 de outubro.

Logo de rematado o prazo de presentación de propostas por parte dos membros do Consello Local de Turismo, o Goberno local, reunido o pasado luns, decidiu outorgarlles as Centolas de Ouro do ano 2015 aos seguintes persoeiros e institucións:

Javier Olleros. Recoñecendo o labor deste cociñeiro, merecedor dunha estrela Michelin, como embaixador dos produtos e da calidade turística do Grove. 

Miguel Muñiz. Como creador da páxina Todogrove, referente da información local e testemuño fundamental da historia recente do Grove. Destacando, ademais, o seu fundamental papel na dinamización cultural da vila. 

Transportes Cameselle. Polo labor pioneiro no transporte de produtos do mar, desde a súa fundación no ano 1957, sendo eixo fundamental do sector pesqueiro e marisqueiro do Grove. 

Empresas conserveiras do Grove. Premio outorgado ás dúas conserveiras que traballan no Grove: Thenaise-Provoté e Isabel de Galicia, por manteren a súa aposta polo noso pobo, facendo unha especial mención ás súas traballadoras e traballadores, que permiten facer da conserva un produto galego vencellado ao Grove. 

No día de onte foilles comunicada esta designación aos galardoados, que se amosaron agradecidos e emocionados polo nomeamento. A entrega da Centola de Ouro terá lugar o vindeiro 9 de outubro ás 21.00 h nun acto que se celebrará na carpa institucional do Corgo. 

As Centolas de Ouro

O distintivo “Centolas de Ouro” é un dos máximos recoñecementos institucionais que cada ano realiza o Concello do Grove. Trátase de premiar aquelas persoas que, dalgún xeito, teñen destacado pola súa traxectoria profesional ou persoal e que, dalgún xeito, gardan relación directa coa localidade e a súa proxección. 

Desde o ano 1972, en que naceron, este recoñecemento ten acadado cada vez maior valor. Contan con esta distinción varios colectivos e empresas, como Amegrove, La Voz de Galicia, Faro de Vigo, Insuiña, os traballadores do Gran Hotel da Toxa... Tamén persoeiros como Belén Constela; Emma Lustres, de Vacafilms; Modesto Lomba; Isaac Díaz Pardo; Mariano Rajoy; o pintor Ernesto Goday ou o escultor Alfonso Vilar. Tamén o recibiron destacados grovenses como Digna Prieto, do restaurante Crisol; Manuel Sanmartín, do Combatiente; a familia do Hotel Villajuanita; Marisol Prieto, do Dorna; a familia Veiga, do Restaurante Posada del Mar… entre outros moitos.