Actividades de naturaleza para escolares

Ao longo dos vindeiros meses e ata o mes de xuño, o Obradoiro de Emprego Monte das Flores IV, promovido polo Concello do Grove, desenvolverá unha serie de actividades dirixidas a escolares dos centros públicos da nosa Comunidade Autónoma. Estas actividades desenvolveranse ao longo de distintos espazos naturais do concello do Grove e serán levadas a cabo polos alumnos-traballadores da especialidade de Educación Medioambiental. Ata o momento temos ao redor de 1300 reservas confirmadas, e aínda quedan días libres para os centros que desexen participar nestas actividades, que poderán facer as súas reservas nos tels.: 986 733 001 ou 630 733 565.

As actividades programadas levaranse a cabo en horario de mañá e terán unha duración aproximada de 3 horas e media. As devanditas actividades son as seguintes:

· Desde o ceo á marisma, un mundo de aves por descubrir.

· Marisqueo a pé: “Rañando a area”.

· Oficios mariñeiros, da terra ata o mar: un camiño de ida e volta.

· Enredados na natureza, harmonía coa paisaxe.

Tamén, e a partir do mes de marzo e cos mesmos horarios, levaranse a cabo outras actividades programadas para o público en xeral, e que lles permitirán aos asistentes estar en contacto coa natureza, gozando dos contornos naturais que ofrece O Grove. Estas actividades son as seguintes:

· Roteiro saudable “Illa da Toxa”, Empápate de Natureza, lenda e realidade.

· Roteiro saudable “Lagoa da Bodeira”, Cara a cara coa natureza.

· Roteiro saudable “Adro Vello”, Camiño a unha historia de lendas.

Mañá xoves levarase a cabo a actividade denominada “Desde o ceo á marisma, un mundo de aves por descubrir”, coa participación de corenta escolares pertencentes o CEIP Rosalía de Castro do concello do Grove. Asistirán os concelleiros de Medio Ambiente e Persoal, Noemi Outeda e Xan Lamelas.

A actividade ten como principal finalidade coñecer a marisma do Vao, incluída no complexo intermareal Umia-Grove (catalogado como Zona Especial Protección para Aves, Lugar de Interese Comunitario, integrado no convenio Ramsar ).

A xornada comeza na aula da natureza do Concello, situada no monte da Siradella onde se introduce os participantes no mundo da ornitoloxía a través dunha presentación en Power Point e desde o miradoiro os alumnos realizan prácticas de manexo dos prismáticos, de orientación e interpretación do contorno natural e xeográfico no que se atopan. A continuación visitase a Lagoa da Bodeira e ás casetas de avistamento, situadas no istmo da Lanzada, onde se estude in situ as distintas clases de aves migratorias que se achegan ata esta marisma.