Convocadas as probas para obter os Celga 2018

Fecha: 2018-03-15

Serán a derradeira fin de semana de maio e a primeira de xuño.

Este ano o importe correspondente á inscrición nas probas é de 15,93 euros.

O Servizo de Normalización Lingüística (SNL) do Concello do Grove informa de que no DOG de antonte martes 13 de marzo, a Xunta de Galicia publicou a Resolución do 6 de marzo de 2018, da Secretaría Xeral de Política Lingüística, pola que se convocan as probas para a obtención dos certificados de lingua galega, niveis Celga 1, 2, 3 e 4, no ano 2018 (procedemento ED114A).

O prazo de inscrición nestes exames, que se realizarán os días 26 e 27 de maio (Celga 4 Celga 2, respectivamente) e 2 e 3 de xuño (Celga 3 e Celga 1, respectivamente) en Santiago de Compostela e en Ponferrada (os niveis 2, 3 e 4), está aberto ata o vindeiro 13 de abril. Canda a publicación das listaxes definitivas de persoas admitidas, o departamento fará públicos os espazos e horarios.

Cómpre salientar que, aínda a Administración autonómica indica na convocatoria que as solicitudes se presentarán, preferiblemente, por vía electrónica a través do formulario normalizado dispoñible na sede electrónica da Xunta de Galicia, https://sede.xunta.gal (procedemento ED114A), tamén advirte que, opcionalmente, se poderán presentar presencialmente en calquera dos lugares e rexistros establecidos na normativa reguladora do procedemento administrativo común.

Finalmente, lembramos que o SNL do Grove está a impartir desde o pasado novembro senllos cursos gratuítos de lingua galega preparatorios para os Celga niveis 1 e 2 (os martes e venres de 10.00 a 11.30 h) e para os niveis 3 e 4 (os luns e xoves de 19.30 a 21.00 h). Estas clases, que nun principio ían ser de 70 horas lectivas, van continuar ata as datas dos exames, ante a demanda e a boa acollida do alumnado asistente.