Éxito de aprobados nos exames Celga 2018 entre o alumnado dos cursos de galego organizados polo Concello do Grove

Fecha: 2018-09-07

O 100% do alumnado presentado á pasada convocatoria de maio e xuño das probas para obter o certificado de lingua galega (Celga) aprobou os seus exames.

O Servizo de Normalización Lingüística (SNL) do Concello do Grove está de celebración. Todos os alumnos e alumnas que se formaron nos cursos de lingua galega impartidos por este departamento municipal e que decidiron presentarse aos exames para obteren os diferentes niveis Celga superaron as probas.

A estes exames oficiais, que se realizaron en Santiago de Compostela a finais de maio e comezos de xuño deste ano, presentáronse un total de 7 estudantes, a maioría residentes no concello meco, pero de procedencia moi diversa. Concretamente, Valladolid, Brasil, as Illas Canarias, Asturias, Inglaterra, Poio e O Grove. En canto aos niveis, dous aprobaron o Celga 2, unha o Celga 3 e o 4 e os catro restantes o Celga 4.

Os cursos de lingua galega organizados e impartidos desde hai xa varios anos polo Concello do Grove a través do seu servizo lingüístico son gratuítos e están dirixidos a persoas maiores de 16 anos. Duran un total de 70 horas lectivas, distribuídas en clases de unha hora e media de duración, dous días á semana. As clases están deseñadas desde unha perspectiva de interculturalidade e diversidade, polo que a elas poden acudir tanto persoas galegas como estranxeiras. Aínda que o seu fin primordial é acadar unha formación que permita obter os Celga, tamén pode asistir ás aulas quen queira adquirir, aumentar ou mellorar os seus coñecementos e capacidades orais ou escritas na lingua propia de Galicia.

A finais de ano abrirase o prazo para unha nova edición desta actividade formativa.