Prazas completas no obradoiro que Pepe Carreiro ofreceu o sábado dentro do programa 'As imaxes tamén contan'

Fecha: 2014-03-24

• Preto de 150 persoas participaron neste programa, que se desenvolveu na biblioteca municipal entre febreiro e marzo

• Organizado polas concellerías de Educación e de Documentación, Patrimonio e Novas Tecnoloxías

A biblioteca municipal do Grove acolleu durante a mañá do pasado sábado o último dos obradoiros incluídos no programa “As imaxes tamén contan”, posto en marcha polas concellerías de Educación e de Documentación, Patrimonio e Novas Tecnoloxías. De clausurar a actividade ocupouse Pepe Carreiro, escritor, debuxante e ilustrador infantil creador da serie Os Bolechas, cun obradoiro de ilustración. O obradoiro comezou ás 11.00 horas na biblioteca municipal, e as prazas completáronse.

Pepe Carreiro é humorista gráfico, debuxante e guionista de banda deseñada. Tamén é súa a serie Os Formigón (A Nosa Terra); a serie Os Pequenos Barbanzóns, en colaboración con Abraham Carreiro (Toxosoutos); e varios contos para as coleccións Contos do Miño (A Nosa Terra), Merlín (Xerais), Árbore (Galaxia) e A chalupa (Galaxia). Foi terceiro premio ex aequo con Xan González do Concurso Nacional O Facho de Cómics para nenos en 1980, por A illa dos carballos. No ano 2013 recibiu o premio Bo e Xeneroso da AELG.

Con este obradoiro remata un programa que pretendeu achegarlles aos asistentes á experiencia real do debuxo e da ilustración; descubrir as posibilidades expresivas, significantes e comunicativas da imaxe; desenvolver a creatividade dos participantes; promover procesos de coñecemento da animación, mediante técnicas de debuxo e ferramentas tecnolóxicas; ou fomentar a compresión lectora por medio das imaxes e a lectura dos contidos. Esta iniciativa obtivo un importante respaldo por parte da cidadanía, xa que se cubriron a totalidade das prazas dispoñibles en cada obradoiro, permitindo que participasen no programa preto de 150 persoas.

Pola biblioteca municipal pasaron, ademais de Pepe Carreiro, Luis Davila, Mau e Pin –autores de Polo correo do vento- e Gogue.