Unha quincena de mozos participaron no Obradoiro de curtas organizado pola Concellería de Educación

Fecha: 2014-12-23

Os participantes elaboraron unha peza audiovisual

Forma parte da programación de Nadal organizada polo Concello do Grove

Un grupo de quince mozas e mozos participaron no Obradoiro de curtas organizado pola Concellería de Educación, e que se desenvolveu entre onte e hoxe na Casa da Cultura Manuel Lueiro Rey. O obxectivo da actividade é ofrecerlle á mocidade actividades con contidos atractivos para a súa idade. Así, se o ano pasado se apostou pola imaxe e un taller de ilustración, nesta ocasión a Concellería de Educación contou co creador audiovisual Xes Chapela para somerxer aos participantes no mundo audiovisual e a creación de curtametraxes.

Durante oito horas, o alumnado recibiu os coñecementos prácticos precisos para a elaboración dun curto, desde a elaboración do guión, ata o deseño das personaxes, a gravación de escenas ou a realización e montaxe do vídeo.

Programación de Nadal

O obradoiro de creación de curtas inclúese na programación de Nadal do Concello do Grove e que, entre outras actividades, tamén incluíu o espectáculo de Expresións Producións que o pasado venres reuniu na biblioteca municipal a un importante público familiar, ou o Cantacontos para bebés de Pablo Díaz, que se ofreceu o domingo coas prazas completas.