Realizados avances na limpeza da zona rural do Grove

Fecha: 2015-08-26

Durante o último mes completouse a limpeza e a roza das beiras da estrada que une as dúas parroquias e avanzouse na das pistas anexas.

A roza e a limpeza de maleza coordinado desde a Concellería do Medio Rural e San Vicente conseguiu grandes avances no último mes. Ademais de completar diversas zonas de terreos públicos, logrou manter as beiras e as zonas lindantes da estrada principal que une a parroquia de San Vicente e a de San Martiño libres de maleza. Desde esta concellería estase ultimando, ademais, a limpeza das pistas internas da parroquia, algo que resulta fundamental para evitar incendios fortuítos.

Así mesmo, desde a Concellería de Obras e Servizos e a de San Vicente lémbrase a necesidade de que os terreos particulares sexan limpados segundo os requisitos esixidos, tanto na zona rural como na urbana. Nas vindeiras semanas remitiranse os correspondentes comunicados para solicitarlles as persoas propietarias que as limpen antes de ter que aplicar as correspondentes sancións.