Saltar ao contido

Esta web só usa cookies propias técnicas, necesarias para o seu funcionamento. As estatísticas de visitas son anónimas e non usan cookies. Máis información no noso aviso sobre cookies.

Aceptar

O Centro de Día do Grove, pendente da aprobación da Xunta de Galicia

Os traballos de xestión que tiveron que refacer todos os trámites eliminados polo anterior goberno culminaron este luns co último informe requirido polo ente autonómico.

A Xunta de Goberno Local celebrada o martes rematou o último dos trámites requiridos pola Administración autonómica para a aprobación do Plan Especial do Centro de Día e Centro de Saúde nos terreos das Touzas. Lembramos que o referido Plan fora elaborado hai xa seis anos pero fora botado abaixo polo anterior goberno alegando “defectos de forma” entre os que se atopaban o non axuste deste ao Plan de Ordenación do Litoral e outra serie de consideracións.

Este feito supuxo un atraso de varios anos no proxecto, de tal xeito que se tivo que elaborar o proxecto do Plan Especial desde o primeiro paso. Neste período téñense feito informes urbanísticos diversos e mantivéronse continuos contactos coa Xunta de Galicia que é o ente que ten que validar definitivamente os terreos para que o Concello poida poñer en marcha a construción do Centro de Día. O último dos documentos requiridos hai uns meses foi o denominado “Informe de impacto medioambiental”, que tras ser elaborado polo equipo técnico foi validado pola Xunta de Goberno Local.

A partir da remisión deste informe a Santiago, a Xunta de Galicia dispón dun prazo máximo de dous meses para aprobar definitivamente o Plan. Será nese momento cando poidan poñerse en marcha os trámites municipais para a construción do Centro de Día ao tempo que se poderán poñer á disposición da Xunta de Galicia (de novo) os terreos para que constrúa o necesario Centro de Saúde. Desde o Concello do Grove agárdase unha rápida resposta da Xunta para non seguir demorando por cuestións administrativas unha infraestrutura tan necesaria.


Todas as novas