O Concello organiza unha xornada de difusión das axudas do programa Leader Galicia 2014-2020

Fecha: 2017-09-28

O Leader é o conxunto de medidas do Programa de Desenvolvemento Rural (PDR) de Galicia 2014-2020 que se executa baixo metodoloxía Leader impulsada pola Unión Europea desde o ano 1991. Esta metodoloxía ten como principal obxectivo descentralizar as políticas de desenvolvemento rural, de maneira que o territorio rural deixe de ser un simple destinatario destas políticas para converterse en protagonista do seu propio desenvolvemento.

O obxecto da xornada, que desenvolverá GDR Salnés-Ulla-Umia en colaboración co Concello do Grove, é dar a coñecer a nova Estratexia de Desenvolvemento Local a través dos proxectos financiados pola Asociación GDR Salnés-Ulla-Umia dentro do Programa Leader, así como difundir as medidas e o procedemento das axudas do programa Leader Galicia 2014-2020, que xestionará preto de 3 millóns de euros neste novo período para os concellos das comarcas de Caldas e O Salnés.

A xornada está aberta a todo o mundo. Deste xeito, persoas empresarias ou emprendedoras, asociacións e calquera tipo de entidade ou persoa que queira poñer en marcha un proxecto ou teña interese en coñecer as liñas de axuda que hai a través do Programa Leader pode achegarse.

A xornada desenvolverase na Casa da Cultura Manuel Lueiro Rey (rúa Monte da Vila, 11) o día vindeiro 4 de outubro, de 20.30 a 21.30 horas.