Limpeza de colectores amarelos

Fecha: 2010-11-09

A Concellería de Limpeza do Concello do Grove informa de que durante toda esta semana estaranse limpando os colectores amarelos de todo o termo municipal. A limpeza está dentro do marco de traballo organizado e planificado na concellería como unha actividade máis do plan de limpeza e coidado dos servizos de reciclaxe. No que vai de ano fixéronse varias limpezas deste tipo de colectores.

O concelleiro de limpeza, Alfredo Bea, destaca o bo clima de traballo conxunto que está a levar a cabo durante máis de tres anos a concellería que el dirixe coa empresa Global Bambrú (anteriormente Isolux Corsán Servicios) e que o traballo conxunto das dúas entidades logrou a mellora do servizo. Unha das últimas medidas adoptadas foi o reforzo de colectores que se realizou durante o verán, dada a alta produción que se estaba acadando en diversos puntos do concello. A axilidade e a rapidez do estudo posibilitou que se reaccionase a tempo e se puidese dar mellor e máis servizo a varias zonas conflitivas desde o punto de vista da reciclaxe do plástico. Isto posibilitou un aumento do tanto por cento de volume recollido con respecto ao ano anterior. No cómputo xeral, a día de hoxe os datos son excelentes, pois sinalan un aumento considerable no volume e un descenso salientable na porcentaxe de impropios (residuos que non son plástico, como por exemplo, os residuos sólidos urbanos).

A limpeza dos aproximadamente 236 colectores amarelos que existen no noso municipio levaralle á empresa mencionada unha media de cinco días de traballo, con dous homes. Farase unha limpeza con varredoiro, tanto por dentro como por fóra, antes de introducilos no camión lava-colectores.