Saltar ao contido

Esta web só usa cookies propias técnicas, necesarias para o seu funcionamento. As estatísticas de visitas son anónimas e non usan cookies. Máis información no noso aviso sobre cookies.

Aceptar

O CONCELLO PREPARA UN INFORME TÉCNICO PARA TRASLADARLLE Á XUNTA DEMANDAS CONCRETAS DE CARA Á TEMPORADA TURÍSTICA

A excelencia turística do Grove pasa polo mantemento e a continua mellora dos seus servizos para o cal, este ano, será preciso un maior apoio da Xunta de Galicia.

O Concello do Grove segue traballando na toma de medidas que permitan a volta á normalidade da localidade desde distintos ámbitos. Na última semana xa se informou da posta en marcha de medidas de limpeza e acondicionamento, sempre co obxectivo de que a veciñanza do Grove recupere a normalidade e se volvan a poñer nun estado adecuado os espazos públicos, pero tamén coa vista posta na temporada de verán.

A este respecto, o Concello está preparando un informe técnico que lle será trasladado á Xunta de Galicia no cal se indican as necesidades específicas da localidade de cara á tempada de verán. Como xa se expresou, O Grove non aplicará medidas de “cita previa” nas praias ao consideralo unha proposta pouco lóxica e imposible de aplicar nun municipio con máis de trinta areais. Ademais disto, trátase dunha medida que vai en contra da liña de traballo na que se está incidindo e que pasa polo máximo coidado da localidade e a recuperación da normalidade.

Unha das cuestións fundamentais nas que se incide no informe é en que os esforzos que xa realiza o Concello do Grove no relativo a mantemento e limpeza das praias deberán verse reforzados debido ás circunstancias actuais, sendo necesario, por exemplo, ampliar a limpeza dos aseos das praias ou ampliar as zonas de seguimento. Todo isto pasa, sen dúbida, pola maior contratación de persoal para lles facer fronte a estas novas necesidades. No momento actual a contratación de verán é posible grazas aos fondos do Plan Concellos da Deputación de Pontevedra, que permite contar con operarios e operarias de roza e limpeza de praias durante a temporada de verán, pero nestas circunstancias isto non é suficiente, polo que cómpre o apoio da Xunta de Galicia.

O Concello do Grove solicita que, ao igual que se ten feito noutras comunidades autónomas como Andalucía, se habiliten fondos para axudar os concellos turísticos e os costeiros, que teñen necesidades adicionais e específicas para o proceso de recuperación. Os concellos turísticos xa realizan habitualmente grandes esforzos para lles dar un bo servizo ás persoas visitantes, polo que agora, máis que nunca, precisan dun maior apoio.


Todas as novas