Gañadores do concurso de centola viva

Fecha: 2010-12-01

A lonxa de contratación do Grove acolleu na tarde de hoxe o tradicional Concurso de Centola Viva que cada ano se realiza dentro do marco das Xornadas Gastronómicas de Exaltación da Centola, e no que se premia á captura do exemplar, tanto macho coma femia, de maior tamaño de todos os que se acheguen ata a poxa da xornada.

Na presente edición, a femia de maior tamaño, un exemplar de 2 quilos e 150 gramos, foi capturada por Antonio Manuel Otero Aguín a bordo do barco ‘Chapeliño’. No caso dos machos, houbo que nomear a dous vencedores, posto que tanto Félix Piñeiro González, a bordo do ‘Deseado’, como Francisco Leiro Castro, a bordo do ‘Marta’, achegaron á lonxa grovense senllos centolos de 4 quilos 250 gramos, polo que ambos os dous mariñeiros resultaron merecedores do primeiro premio.

Os gañadores deste certame que se enmarca dentro do programa de actos das VIII Xornadas Gastronómicas de Exaltación da Centola, recibirán un premio económico de 200 euros, un diploma e a insignia da Centola de Prata. Os mariñeiro vencedores do concurso celebrado na tarde de hoxe recibirán os seus premios nun acto que se celebrará o vindeiro mércores 8 de decembro ás doce do mediodía na Confraría de Pescadores de San Martiño do Grove.