O punto de lectura Lendo espero do centro de saúde volve a estar operativo

Fecha: 2011-06-22

A Concellería de Novas Tecnoloxías, Documentación e Patrimonio, que dirixe Alexandre Aguín, volve a poñer en funcionamento o punto de lectura Lendo espero, no centro de saúde do Monte da Vila, que levaba inactivo desde hai catro anos.

A principios desta semana, o concelleiro púxose en contacto co xefe de servizo do ambulatorio para ver as posibilidades de retomar o servizo, ao que accedeu inmediatamente por consideralo de interese para o centro e para toda a cidadanía grovense. Así, esta mesma mañá o persoal da Rede de Bibliotecas do Grove preparou os libros e reinstaurou o punto de lectura, que volve a estar operativo desde este momento e atendido polo persoal técnico das bibliotecas do Grove. 

Lendo espero é un campaña permanente de dinamización lectora que consiste na instalación dun posto de lectura, dependente da Rede de Bibliotecas do Grove, no centro de saúde. O proxecto ten por obxecto que os nenos e as nenas que vaian ao médico teñan a posibilidade de se achegaren á lectura e aos libros aproveitando o tempo de espera para a consulta. Esta espera, ás veces, faise longa, polo que ter un libro próximo pode resultar moi agradable e asemade formativo e divertido.