Saltar ao contido

Esta web só usa cookies propias técnicas, necesarias para o seu funcionamento. As estatísticas de visitas son anónimas e non usan cookies. Máis información no noso aviso sobre cookies.

Aceptar

Achégate ao galego. Curso de lingua para novos/as galegos/as no Grove

Dentro do programa "Os novos galegos", o Servizo de Normalización Lingüística (SNL) do Concello do Grove, dependente da Concellería de Novas Tecnoloxías, Patrimonio e Documentación, dirixida por Alexandre Aguín, vai comezar a desenvolver mañá xoves un novo curso básico de galego para persoas chegadas de fóra do país. Desta volta, tamén se poderá apuntar a veciñanza que queira adquirir uns coñecementos básicos sobre o noso idioma.

Cunha perspectiva de interculturalidade e diversidade, o SNL meco pretende que a lingua galega sexa para as persoas de orixe estranxeira outro factor máis de integración na sociedade, ao mesmo tempo que a cidadanía local coñeza as diferentes culturas e as linguas que chegaron ata nós polo vieiro da inmigración.

Con ese motivo, o SNL do Grove ideou, por segundo ano consecutivo, un curso básico de lingua galega que permita un achegamento á lingua e á cultura galega de xeito progresivo e adaptado ás necesidades do alumnado. O obxectivo é facilitar a integración da poboación de orixe estranxeira a través dunhas nocións básicas para a comprensión oral e escrita, e para a fala, ademais de darlles a coñecer a historia e situación da vila, da comarca, e de Galicia en xeral.

Comezo: 14 de marzo

Finalización: 23 de maio

Número de horas: 30 horas

Horario: martes e xoves de 10.00 a 11.30 horas

Lugar: aula de formación da Casa da Cultura Manuel Lueiro Rey (rúa Monte da Vila, 11, primeiro andar)

Destinatarios: poboación de orixe estranxeira, emigrantes retornados, poboación de fóra da nosa comunidade ou veciñanza con coñecementos básicos de galego.

Grupo máximo de 20 persoas

AÍNDA QUEDAN PRAZAS LIBRES

Información e inscricións:

Servizo de Normalización Lingüística do Concello do Grove

Casa da Cultura Manuel Lueiro Rey

Rúa Monte da Vila, 11, baixo

Tel.: 986 733 190

normalizacionlinguistica@concellodogrove.com


Todas as novas