O xurado do II Concurso de Pintura Ernesto Goday xuntouse o xoves 5 de febreiro para ditaminar a obra gañadora da segunda edición do certame

Fecha: 2015-02-09

"Unha vez reunido o xurado do II Concurso de pintura Ernesto Goday para deliberar sobre os resultados da segunda convocatoria concluímos que, pola súa calidade, calquera das dezanove obras expostas podería ser a premiada, pois todas elas, ao noso xuízo, representan a riqueza de estilos que caben dentro deste certame.

Queremos, non obstante, aproveitar para lembrar un par de aspectos importantes que deben ser coñecidos por todos e que rexen en cada edición o traballo desinteresado dos profesionais deste xurado:

1.º Este xurado non ten por que dubidar da validez das obras presentadas a este certame para saíren elixidas, pois presuponse que os participantes coñecen perfectamente as bases e as cumpren. Porén, se este xurado detectase algún incumprimento dalgunha das bases, faríallo saber inmediatamente á persoa implicada.

2.º As valoracións que agora facemos públicas están feitas con base nas votacións que realizamos no seu día analizando estritamente a calidade artística das obras presentadas e non fixándonos en quen eran os seus autores nin cales eran os seus currículos profesionais, pois non é obxecto deste concurso.

Polo tanto, decidimos que os resultados do II Certame de Pintura Ernesto Goday sexan os seguintes:

·                    PRIMEIRO PREMIO: “Marea Baixa”. Pedro Vergara Pastor

·                    ACCÉSIT: “Mariscando na ría”. Diego Vites García

·                    ACCÉSIT: “Al atardecer”. Marene Lasagabáster Tricio

·                    ACCÉSIT: “Repousando no Peirao”. José Miguel Besada Costa

·                    ACCÉSIT: “Rúa da Praza (Luz de Outono)”. Eduardo Baamonde

Aproveitamos a ocasión para invitarvos a participar neste certame de pintura Ernesto Goday e así poder amosar as capacidades artísticas que plasmen a beleza desta contorna.

Un cordial saúdo

O xurado do II Concurso de Pintura Ernesto Goday"